Որպես կանոն աշխատանքային պայմանագրով սահմանված պայմանները կարող են փոփոխվել միայն կողմերի համաձայնությամբ։ Սակայն շատերը չգիտեն, որ որոշ դեպքերում գործատուն իրավունք ունի միակողմանի փոփոխել աշխատանքի էական պայմանները։

Ինչպես տեղեկացնում է Iravaban.net-ը, ՀՀ աշխատանքային օրենսգրքի 105-րդ, 109-րդ, 113-րդ և 115-րդ հոդվածները սահմանում են աշխատանքի էական պայմանների փոփոխման կարգը և աշխատողների իրավունքները։

Ե՞րբ կարող են փոփոխվել էական պայմանները

Օրենսգրքի 105-րդ հոդվածի 1-ին մասի համաձայն՝ աշխատանքի ծավալների և (կամ) տնտեսական և (կամ) տեխնոլոգիական և (կամ) աշխատանքի կազմակերպման պայմանների փոփոխման դեպքում թույլատրվում է փոփոխել աշխատանքի էական պայմանները։

Ի՞նչ են աշխատանքի էական պայմանները

Օրենսգրքի 105-րդ հոդվածի 2-րդ մասի համաձայն՝ աշխատանքի էական պայմաններ են՝

• աշխատանքի վայրը,
• աշխատանքի վարձատրության չափը և (կամ) այն որոշելու ձևը,
• արտոնությունները,
• աշխատաժամանակի (աշխատանքի և հանգստի) ռեժիմը,
• տարակարգերը և պաշտոնների անվանումները,
• Աշխատանքային գործառույթները,
• աշխատանքային պայմանագրի տեսակը։

Էական պայմանների փոփոխման մասին ծանուցման ժամկետները

Օրենսգրքի 115-րդ հոդվածի 1-ին մասի համաձայն՝ աշխատանքի էական պայմանների փոփոխման մասին գործատուն պարտավոր է գրավոր ծանուցել՝

• մինչև մեկ տարի աշխատողին՝ 14 օր առաջ,
• մեկից մինչև հինգ տարի աշխատողին՝ 35 օր առաջ,
• հինգից մինչև տասը տարի աշխատողին՝ 42 օր առաջ,
• տասից մինչև տասնհինգ տարի աշխատողին՝ 49 օր առաջ,
• տասնհինգ տարուց ավելի աշխատողին՝ 60 օր առաջ։

Վարձատրության փոփոխում առանց համաձայնության

Օրենսգրքի 105-րդ հոդվածի 3-րդ մասի համաձայն՝ առանց աշխատողի գրավոր համաձայնության աշխատանքի վարձատրության չափը և (կամ) այն որոշելու ձևը գործատուն կարող է փոփոխել միայն օրենքով կամ կոլեկտիվ պայմանագրով աշխատանքի վարձատրության պայմանների փոփոխության դեպքում, որի մասին գործատուն գրավոր ձևով պետք է ծանուցի աշխատողին ոչ ուշ, քան մեկ ամիս առաջ։

Եթե աշխատողը չի համաձայնվում

Օրենսգրքի 105-րդ հոդվածի 5-րդ մասի համաձայն՝ եթե աշխատանքի նախկին էական պայմանները չեն կարող պահպանվել, իսկ աշխատողը չի տվել իր գրավոր համաձայնությունը աշխատանքը նոր պայմաններում շարունակելու համար, ապա աշխատանքային պայմանագիրը լուծվում է օրենսգրքի 109-րդ հոդվածի 1-ին մասի 9-րդ կետի համաձայն։

Նոր աշխատանք փնտրելու ազատ ժամանակ

Օրենսգրքի 115-րդ հոդվածի 4-րդ մասի համաձայն՝ ծանուցման ժամանակահատվածում նոր աշխատանք փնտրելու համար գործատուն պետք է աշխատողին տրամադրի ազատ ժամանակ։ Տրամադրվող ժամանակի տևողությունը չի կարող պակաս լինել ծանուցման ժամանակահատվածում ներառվող աշխատաժամանակի տասը տոկոսից։ Այդ ժամանակահատվածում պահպանվում է աշխատողի միջին աշխատավարձը։

Հատուկ պաշտպանություն մինչև 1 տարեկան երեխա խնամողների համար

Օրենսգրքի 105-րդ հոդվածի 1.1-ին մասի համաձայն՝ երեխային փաստացի խնամող՝ արձակուրդում չգտնվող անձի՝ մինչև մեկ տարեկան երեխա խնամելու ամբողջ ժամանակահատվածում աշխատանքի էական պայմանները չեն կարող փոփոխվել նվազ բարենպաստ պայմանների, բացառությամբ պաշտոնի անվանման և (կամ) տարակարգերի։

Ուշադրություն. աշխատանքի էական պայմանների փոփոխման մասին գործատուն պարտավոր է գրավոր ծանուցել աշխատողին օրենքով սահմանված ժամկետներում՝ 14-ից 60 օր կախված աշխատաստաժից։ Եթե աշխատողը չի համաձայնվում նոր պայմաններին, պայմանագիրը լուծվում է, – տեղեկացնում է Iravaban.net-ը։

Հավելյալ տեղեկությունների համար կարող եք այցելել Iravaban.net առցանց մասնագիտական մեդիա։

Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ Կոնկրետ իրավիճակներում իրավաբանական խորհրդատվություն ստանալու համար անհրաժեշտ է դիմել մասնագետի։