Yle Uutiset ja urheilu -ovttadaga jođiheaddji ja vástideaddji oaivedoaimmaheaddji Panu Pokkinen lea vádjolan gaskavahku suoidnemánu 8. beaivve. Son lei 49-jahkásaš.
Pokkisa váibmu bisánii fáhkkestaga luopmomátkkis Lissabonas geassemánu álggus. Son lei golbma váhku buohcceviessodivššus Lissabonas, man maŋŋá su sirde joatkkadutkamušaide Supmii.
Pokkinen lei buorráneamen buorre muddui, muhto su váibmu bisánii fáhkkestaga nuppádassii Helssegis buohcceviesus mannan vahkus.
Yle doaibmajođiheaddji Marit af Björkesten muitala, ahte dáhpáhus guoskkaha ja morašta Yle bargoveaga sákka.
– Min jurdagat leat ovddemuččas Panu bearraša ja lágaš olbmuid luhtte. Váldit liekkusvuođain oasi stuorra morrašii. Mii figgat doarjut sin buot vejolaš vugiid mielde. Manaheimmet fiinna olbmo ja liekkus, earáin berošteaddji, čuovgga bukti ja dehálaš bargoskihpára. Jođiheaddjin son ođasmahttii sihke journalismma ahte olles Yle ámmátdáidduin, roahkkadit ja gudneáŋgirit.
Váldodoaimmaheaddjin váttis dillái
Pokkinen álggahii Yle Uutiset vástideaddji váldodoaimmaheaddjin váttis dilis 2024 čakčat. Ovddabealde ledje stuorra čuohppamat ja olles bargoveaga bargoárgii váikkuheaddji rievdadusat.
Ovdal barggu álggaheami Pokkinen logai, ahte son liiko veahkehit olbmuid beassat movttiidahtti rievdadussii. Váldodoaimmaheaddji čađahii gudneáŋgiris nuppástusráđđádallamiid ja lihkosmuvai seastit nu olu go lei ulbmilin.
Liekkus deaivvademiin, čavga ulbmiliin
Jođiheaddjin Pokkinenis lei álot astu lonuhit moadde sáni. Son lei liekkus deaivvademiin, čavga ulbmiliin.
Mearrádusainis Pokkinen ii dávjá oba sparggihan.
Soalddátduogáš oidnui Pokkinena doaimmas. Son barggai 200-logu álggus Bealuštanfámuin, offisearan Säkyläs ja siviilan Ruotuväki-bláđi váldodoaimmaheaddjin oktiibuot guhtta jagi.
Bealuštanfámuin Pokkinen sirdašuvai Ilta-Sanomat ođashoavdan ja Iltalehtii, gos son doaimmai earret eará ođasváldodoaimmaheaddjin.
Yles Pokkinen barggai jagi 2013 rájes. Son lei soahtediehtagiid magisttar ja servvodatdiehtagiid magisttar.
Vástideaddji doaimmaheaddjin Pokkinen deattuhii báikkálašvuođa ja báikki alde leahkima mearkkašumi. Son maid háliidii vástidit čielgaseappot go árat kritihkkii, mii Ylei bođii.
Pokkinen ipmirdii, ahte molsašuddi máilmmis maid Yle galgá rievdat. Sus lei nana oaidnu das, mot boahttevuođa journalisma dahkko.
Pokkinen lei joavkospealli
Pokkinen lei eret Tamperes. Son spealai mánnávuođa rájes korespáppa ja barggai duopmárin. Son lei joavkospealli ja vieččai jođihandáiddu joavkovaláštallamis.
Ovdal go bargagođii vástideaddji váldodoaimmaheaddjin, Pokkinen barggai vuos Yle Urheilu valáštallanossodaga hoavdan ja dan maŋŋá Valáštallan ja dáhpáhusat -ovttadaga jođiheaddjin. Valáštallama bealde hoavdda giitaledje das mot son nagodii dikšut ruossalasvuođaid nu ahte buohkat ledje duhtavaččat.
Valáštallama dásseárvu lei lahka Pokkinen váimmu. Son figgai buoridit earenomážit nissoniid sajádaga valáštallamis ja buktit iešguđet šlájaid oidnosii.
Pokkinenis lei viiddes fierpmádat oahppásiin, mii lei mediamáilmmis gitta valáštallama ja kultuvrra váikkuheddjiide. Son lei oahpes ámadadju iešguđet šlájaid geahččiid siste ja lovttii dáhpáhusain olbmuiguin.
Árggas luovus valáštallama bokte
Friijaáiggistis Pokkinen lávii geahččat televišuvnnas buorremiellasáddagiid, muhto árggas son luovvanii valáštallama bokte. Pokkinen earret eará viegai bálgámaratonaid (su: polkumaraton), juoba ultramátkkiid ja čuoiggai iešguđet guovlluin Suomas.
Pokkinen gilvvii humora, iige váldán iežas nu menddo duođas. Son suohtastalai govvii sosiála mediai goas dal márffiid ja goas erenomáš bajálušaid.
Váldodoaimmaheaddji sáhtii deaivat bearjadagaid St. Urho’s Pubbas Helssegis dahje Salhojankatu pubbas Tempereres.
Pokkinen čuovui áhčis luottaid
Bearaš lei Pokkisii dehálaš. Nuppelotjahkásaš nieiddainis Pokkinen ságastalai dávjá šearbmaáiggi birra ja deattuhii medialohkandáiddu mearkkašumi. Áhčči lei maiddái mielde nieiddas korespábbajoavkku hárjehanjoavkkus. Pokkinena guoibmi Paula Pokkinen bargá Yle Tutkiva+ -doaimmahusa doaimmahushoavdan.
Pokkinen čuovui áhčis luottaid. Jorma Pokkinen barggai ovdal ealáhahkii báhcima Aamulehti ođasváldodoaimmaheaddjin ja lea menestuvvan junioraid korespábbahárjeheaddjin.
Panu Pokkinen válddahalai iežas ođasolmmožin, geas lea jođiheapmi varas.
