Lohpe- ja bearráigeahččodoaimmahat gohčču Lappi buresbirgenguovllu ordnet Männikkö bálvalandálu bálvalusaid lága mielde. Bálvalandállu lea Anára gielddas, Avvilis ja lohpe- ja bearráigeahččodoaimmahaga mearrádusas ássiid bálvalusat galget leat ordnegis ovdal borgemánu loahppa, muitala doaimmahat dieđáhusastis.
Lohpe- ja bearráigeahččodoaimmahat álggahii bearráigeahču ja finai ovddalgihtii almmutkeahttá bálvalandálus dárkkistantuvrras ođđajagimánus bálvalandálus dáhpáhuvvan áššehasa jápmima maŋŋá.
Čielggadeami mielde bálvalandálus lea menddo unnán bargoveahka ássiid ektui. Divššáriidda gullet olu eará barggut dego borramušaid juohkin ja lihtiid bassan.
Lohpe- ja bearráigeahččodoaimmahaga mielde bargoveahka ii leat doarvái áššehasaid dárbbuid ektui, mii dagaha diliid, mat áitet áššehasaid dorvvolašvuođa.
Bearráigeahčus boahtán dieđu mielde bálvalandálus geavahit olu ráddjendoaimmaid, dego hygienabiktasiid, seaŋgaravddaid ja háhcceboahkániid.
Allagohcci Mervi Lukkarinen Lohpe- ja bearráigeahččodoaimmahaga sosiála- ja dearvvasvuođasuorggis lohká, ahte sin mielas ii leat dohkkehahtti geavahit iešmearrideami ráddjema vuosttas doaibman. Mearrádusa doaimma ráddjemis ii sáhtte maiddái addit ovddalgihtii iige doaisttážii fámus leahkki doaktára mearrádusain.
Lohpe- ja bearráigeahččodoaimmahat cuigii Lappi buresbirgenguvlui, ahte galgá sihkkarastit, ahte ráddjendoaimmain mearridit doaktárat ja daid geavaheamis dahkkojuvvojit doaimmahaga rávvaga mielde merkemat.
Lappi buresbirgenguovllu eallilan olbmuid vásttusuorggi jođiheaddjái adde cuigema das, ahte son galgá fuolahit bálvalusaid ordnemis lágas gáibiduvvon vuogi mielde. Son galgá maiddái fuolahit das, ahte doaimmaid čuvvot siskkáldasat.
Lohpe- ja bearráigeahččodoaimmahat ávžžuha, ahte buresbirgenguovlu sihkkarastá áššehasaid olgun fitnama ja sosiála ovttastallama.
Lappi buresbirgenguovlu galgá doaimmahit čakčamánus Lohpe- ja bearráigeahččodoaimmahahkii čielggadeami doaimmain, maid bálvalandálus leat dahkan.
Buresbirgenguovlu ii áiggo lasihit bargoveaga
Lappi buresbirgenguovlu muitala iežas dieđáhusas, ahte Männikkö váilevašvuođat eai boađe bargiid menddo uhca mearis, muhto baicce barggu organiseremis ja bajás mearkumis.
Buresbirgenguovllus muitalit, ahte Männikkös lea 57 báikki ja iđit- sihke eahketvuoruin barget 11 divššára ja idjavuorus golbma divššára. Dainna lea lága gáibiduvvon mearri devdojuvvon iige divššáriid leat áigumuš lasihit.
Ovttadaga váttisvuođat leat buresbirgenguovllu mielde boahtán boasttoipmárdusain das, man dávjá áššehasaid galgá seaŋggas loktet. Maiddái ráddjendoaimmaid mearkumis leamašan váilevašvuođat. Daid figget divvut.
Buresbirgenguovllus háliidit maiddái doalahit áššehasaid iešmearridanvuoigatvuođa borademiid olis ja diktit áššehasaid boradit dalle go háliidit ja lihkket.
Áššehasaid ráddjendoaimmaid eai buresbirgenguovllu dieđáhusa vuođul geavat jeavddálaččat, baicce doaktára mearrádusain maŋimuš vuohkin dalle go riskadilit leat boahtán ovdan. Ovttadagas eai leat várás mearriduvvon eaige doaisttážii fámus leahkki ráddjendoaimmat.
Lappi buresbirgenguovlu buktá ovdan, ahte divššu dárbu lassána, muhto eiseválddiid norpmat čavget ja mannet ruossalassii.
– Ádden bures, ahte bargoveagas lea vuolleárvosaš dovdu. Masá buot min ovttadagain lea dán áigge unnit bargoveahka go ovdal. Go bargoveahka geahppána de dat gáibida álo maiddái doaimma rievdadeami ja árat doaibmadábiin luohpama. Máŋgga ovttadagas dát rievdadus lea vel gaskan ja danin bargu orru losit, muitala Lappi buresbirgenguovllu eallilanolbmuid bálvalusaid jođiheaddji Annukka Marjala dieđáhusas.
Marjala lohká, ahte sii váldet lohpe- ja bearráigeahččodoaimmahaga mearrádusa duođas ja gieđahallet dan fuolalaččat.
