Boazoparlameanttas Roavvenjárggas geigejedje maiddái dán jagi bálgosiid ovttastusa ánsomearkkaid.
Ánsomearkka sáhttá mieđihit olbmui, gii lea bargan boazodoalu ovdii. Bálgosiid ovttastus mearrida juohke ánsomearkkas sierra.
Bálgosiid ovttastusa ságadoalli Matti Riipi mielas lea fiinnis beassat juohkit ánsomearkkaid olbmuide, geaid barggu son gudnejahttá.
– Háliidit buktit oidnosii boazodoalu ovdii dahkkon barggu ja oainnán, ahte dainna gudnejahttit sin.
Boazoparlameanttas ságastalle maiddái boazodoalu dilis. Ságadoalli Riipi lohká, ahte giđđa lea lemašan boazodoalu dáfus buorre ja vuordimis lea dábálaš miessejahki.
– Bievllai oalle árrat ja lei unnán muohta. Lea gullo leamaš buorre dilli.
Mannan geassi buvttii goittot hástalusaid báhkaid dihte ja ragatáigi sáhtii oasil eahpelihkosmuvvat. Boahtte jahkái goittot lea buorre doaivva.
– Dovddan, ahte dat, mii guoddá min ealáhusa, lea vuordit daid buriid jagiid, lohká Riipi.
