داومت اليوم لأول مرة ومعي دفتر محاضرات وقلم واكتشفت ان الطلاب كلهم معهم ايبادات ، كان بس ناقص اجيب حصاتين واضربها ببعض واشب نار عشان اثبت لهم اني رجل كهف حقيقي
صديقي "المتزوج حديثًا" كنا دايم نطلع من الدوام ونفطر ببوفيّة وكان يقول لي متى اتزوج بس واخليها تسوي لي فطور قبل اداوم بدال اكل البوفيات ، الحين هو جالس يفطر معي في نفس البوفية
ولد اخوي عمره ٥ سنين ومافيه احد بعمره يلعب معه وصار يعتمد على الخيال وهو يلعب ويتخيّل اصدقاء يلعبون معه ، قبل شوي لقيته يلعب كورة بالحوش لحاله ورحمته قلت بلعب معه ويوم قربت منه قال لي لا لا وخر انت لا تخرب المباراة ، خلك حكم بيننا
الحمدلله اني ولدت بالزمن هذا وفيه شيء اسمه مطعم ولا تخيل انك مولود قبل ٣ الاف سنة ويتلخبط نومك وتصحى اخر الليل ذابحك الجوع وتمشي بالظلام تدوّر لك غزال ولا ارنب تاكله
وقفت عند الدرايف ثرو وقلت له "بارد صغير" قال وش اللي بارد صغير؟ قلت قهوة اليوم يعني وش!! قال قل قهوة اليوم مافيه مشروب اسمه بارد صغير ، تخيلوا كانت هذي المحادثة بداية جدال طويل بيني وبين كاشير الدرايف ثرو وانتهى الموضوع اني مشيت وما طلبت شيء ، اخلاق الصباح ❤️❤️