O campus de Ourense acollerá do 27 ao 29 de xaneiro o 8th DualSPHysics Workshop. Nel daranse a coñecer as últimas novidades no software DualSPHysics, creado polo grupo do Centro de Investigación Mariña (CIM) da Universidade de Vigo EPhysLab (Environmental Physics Laboratory) en colaboración coa University of Manchester (Reino Unido), a Università degli Studi di Parma (Italia), a Universitat Politècnica de Catalunya e o New Jersey Institute of Technology (EEUU).
A cita está organizada por EPhysLab e terá lugar no edificio Politécnico do campus, contando coa asistencia de case 70 especialistas de universidades e empresas de 17 países (España, Austria, Bélxica, Canadá, Chile, China, Francia, Alemaña, Italia, Xapón, Panamá, Portugal, Arabia Saudí, Eslovenia, Suecia, Reino Unido e Estados Unidos).
