vassmelon

Vassmelon er eittårige krypande eller klatrande slyngplantar med slyngtrådar og flikte blad. Dei gule kronblada er samanvaksne med fem flikar. Blomane er einkjønna. Hannblomane har fem pollenberarar som sit saman i opninga til blomen. Hoblomen er oversitjande i forhold til fruktknuten. Frukta er botanisk sett eit bær, det vil seie ei frukt med mange frø som ikkje sprekk opp for å spreie frøa.

Frukta, vassmelonen, varierer mellom dei ulike variantane, men er alltid ei stor avlang frukt på mellom 3 og 20 kilo. Skalet er glinsande mørkegrønt, ofte med lyse flekker eller stripar. Fruktkjøtet er oftast lyseraudt, men variantar med gult, oransje eller kvitt finst òg. Uansett farge er fruktkjøtet velsmakande og har mange svartbrune frø spreidd i kjøtet. Dette er i motsetnad til melon som har frøa samla i sentrum av frukta. Variantar av vassmelon utan utvikla frø er òg vanlege i bruk.

Vassmelon er svært vasshaldig, vassinnhaldet er om lag 92 prosent. Han inneheld cirka 8 milligram vitamin C, 7,1 gram karbohydrat, 116 milligram kalium og 135 kilojoule tilførte energi per 100 gram etande vare.

Vassmelonen kjem frå Sør-Afrika, men vart dyrka i middelhavslanda og Orienten alt før vår tidsrekning byrjar.

• gresskarfamilien
• melon
• agurk