کراچی:سندھ کے صوبائی وزیر اطلاعات و ٹرانسپورٹ شرجیل انعام میمن نے کہا ہے کہ پاکستان نے ہر محاذ پر بھارت کو گھٹنے ٹیکنے پر مجبور کر دیا ہے اور جنگی و سفارتی محاذ پر بھارت کی شکست کے بعد آج دنیا بھر میں پاکستان کے 'گرین پاسپورٹ' کی قدر و منزلت میں واضح اضافہ ہوا ہے۔
کراچی میں ایک تقریب سے خطاب کرتے ہوئے شرجیل میمن نے بھارتی وزیر خارجہ ایس جے شنکر کے حالیہ بیانات کو کڑی تنقید کا نشانہ بنایا۔ انہوں نے کہا کہ جے شنکر کی بدزبانی اور گالم گلوچ اس بات کا ثبوت ہے کہ بھارت کے پاس اب کوئی ٹھوس دلیل باقی نہیں رہی اور وہ پاکستان کی بڑھتی ہوئی کامیابیوں سے بوکھلاہٹ کا شکار ہے۔
صوبائی وزیر نے مشرقِ وسطیٰ کی صورتحال پر تشویش کا اظہار کرتے ہوئے کہا     مشرقِ وسطیٰ میں جاری جنگ کی وجہ سے اس وقت پورے خطے کو شدید مشکلات اور چیلنجز کا سامنا ہے۔    ان کٹھن حالات میں بھی دنیا پاکستان کے مرکزی اور کلیدی کردار کا اعتراف کر رہی ہے۔
    پاکستان کی خارجہ پالیسی اور علاقائی امن کے لیے کوششیں عالمی سطح پر سراہی جا رہی ہیں۔
شہرِ قائد کے حوالے سے گفتگو کرتے ہوئے شرجیل میمن نے عوام کو خوشخبری سنائی کہ سندھ حکومت کراچی کی ترقی کے لیے دن رات کوشاں ہے۔ انہوں نے کہا  کراچی کے عوام کی سہولت کے لیے ٹرانسپورٹ اور انفراسٹرکچر کے کئی بڑے منصوبے جاری ہیں جنہیں جلد مکمل کیا جائے گا تاکہ شہریوں کو ریلیف فراہم کیا جا سکے۔

لاہور:حکومتِ پنجاب نے صوبے بھر کے تمام سرکاری اور نجی تعلیمی اداروں کے لیے نئے اوقاتِ کار کا نوٹیفکیشن جاری کر دیا ہے۔ اس انقلابی فیصلے کے تحت اب پنجاب کے تعلیمی اداروں میں ہفتہ وار تعطیلات میں اضافہ کر دیا گیا ہے، جس کا مقصد طلبہ اور اساتذہ کی کارکردگی میں بہتری لانا ہے۔
حکومتی اعلان کے مطابق تعلیمی ہفتے کی ترتیب درج ذیل ہوگی۔پنجاب بھر کے تمام سرکاری اور نجی سکولوں میں اب جمعہ، ہفتہ اور اتوار کو چھٹی ہوگی۔تمام تعلیمی ادارے ہفتے میں صرف 4 دن (پیر، منگل، بدھ اور جمعرات) کھلا کریں گے۔ اس فیصلے کا اطلاق صوبے کے تمام چھوٹے بڑے شہروں کے سرکاری و نجی سکولوں، کالجوں اور یونیورسٹیوں پر یکساں طور پر ہوگا۔

کراچی:پاکستان کی مالیاتی منڈیوں میں آج زبردست تیزی کا رجحان رہا۔ پاکستان اسٹاک ایکسچینج (PSX) نے تاریخ کی بلند ترین سطح کو چھو لیا۔کے ایس ای 100 انڈیکس (KSE-100) میں ایک ہی دن میں 8,514 پوائنٹس کا ریکارڈ اضافہ دیکھا گیا۔ اس تیزی کے بعد انڈیکس 1 لاکھ 57 ہزار 250 کی سطح پر جا پہنچا ہے۔
 مارکیٹ میں تیزی کا عالم یہ تھا کہ جب انڈیکس 7 ہزار پوائنٹس سے تجاوز کر گیا تو ضابطے کے تحت ٹریڈنگ ایک گھنٹے کے لیے روک دی گئی۔ تاہم، دوبارہ آغاز کے بعد بھی تیزی کا تسلسل برقرار رہا۔

پاکستان کے عدالتی نظام کے خلاف حالیہ بین الاقوامی پروپیگنڈے اور عمران خان کی رہائی کے لیے بڑھتے ہوئے بیرونی دباؤ کے تناظر میں یہ واضح کر دیا گیا ہے کہ پاکستان ایک خود مختار ریاست ہے، جہاں فیصلے عدالتیں کرتی ہیں، اخباری کالم یا غیر ملکی لابیئسٹ نہیں۔

عدالتی فیصلوں اور  لاخارجی لابنگ کے حوالے سے ہیومن رائٹس لائر ایرک لیوس  نے  ایک دی انڈیپنڈنٹ یو کے میں ایک آرٹیکل لکھا ہے اوراس میں   عمران خان کی رہائی کے حوالے سے  اظہار خیال کیا ہے۔ تاہم اس بارے میں   پاکستان کے اندرونی قانونی معاملات اور سابق وزیراعظم عمران خان کی رہائی سے متعلق حالیہ عالمی مہم اور بین الاقوامی جریدوں میں چھپنے والے مضامین پر سخت ردِعمل سامنے آیا ہے۔ ماہرین اور تجزیہ کاروں کا کہنا ہے کہ بیرونی بیانیے کے ذریعے پاکستان کے خود مختار عدالتی نظام کو دبانے کی کوششیں جمہوری اور قانونی اصولوں کے منافی ہیں۔

رپورٹ کے مطابق، حال ہی میں ایرک لیوس اور دیگر مبصرین کی جانب سے بین الاقوامی میڈیا میں جو دلائل دیے گئے ہیں، وہ قانونی حقائق کے بجائے محض ’سیاسی وکالت‘ پر مبنی ہیں۔ یہ واضح کیا گیا ہے کہ عمران خان کی حراست ’من مانی‘ نہیں بلکہ وہ پاکستانی قانون کے تحت مختلف کیسز میں سزا یافتہ قیدی ہیں۔ عالمی سطح پر اسے ’سیاسی مظلومیت‘ بنا کر پیش کرنا پاکستان کے قانونی ریکارڈ اور عدالتی طریقہ کار کو مسخ کرنے کے مترادف ہے۔

تجزیے میں اس دعوے کو مسترد کر دیا گیا ہے کہ پاکستان کا استحکام کسی ایک شخصیت سے جڑا ہے۔پاکستان نے حالیہ عرصے میں ثابت کیا ہے کہ ریاست اداروں کے ذریعے چلتی ہے۔ امریکہ اور ایران کے درمیان حالیہ بیک چینل سفارت کاری اور علاقائی امن کی کوششوں میں اسلام آباد کا کلیدی کردار اس بات کا ثبوت ہے کہ ملکی پالیسیاں کسی فرد کے گرد نہیں گھومتیں۔سابقہ دور حکومت میں کوالالمپور سمٹ اور او آئی سی کے معاملے پر پیدا ہونے والے سفارتی تناؤ نے ثابت کیا تھا کہ غیر مستقل مزاجی ریاست کے لیے نقصان دہ ہوتی ہے، جسے بعد میں اداروں نے بڑی محنت سے درست کیا۔
رپورٹ میں خبردار کیا گیا ہے کہ یہ کہنا کہ "کسی فرد کے خلاف قانونی کارروائی ملک میں عدم استحکام لائے گی" دراصل تجزیہ نہیں بلکہ ’پریشر ٹیکٹک‘ ہے۔    پاکستان کے خود مختار نظامِ عدل کو یہ حق حاصل ہے کہ وہ بیرونی مداخلت کے بغیر فیصلے کرے۔    کسی فرد کی قانونی تقدیر کو ریاست کی بقا کا مسئلہ بنانا ایک خطرناک بیانیہ ہے جو جمہوری اقدار کو نقصان پہنچاتا ہے۔
 پاکستان کا پیغام واضح ہے کہ عالمی برادری اور لابیئسٹس کو سمجھنا چاہیے کہ خود مختار ریاستوں کے عدالتی فیصلے ’اوپ ایڈز‘ (Op-eds) یا لابیئنگ کے ذریعے نہیں بلکہ شواہد اور قانون کی بنیاد پر عدالتوں میں ہی ہوں گے۔

کراچی :پاکستان سٹاک مارکیٹ میں آج کاروبار کا آغاز ایک بڑے دھماکے کے ساتھ ہوا، جہاں انڈیکس نے ملکی تاریخ کی بلند ترین سطح کو چھو لیا ہے۔ سرمایہ کاروں کی جانب سے جارحانہ خریداری کے نتیجے میں مارکیٹ میں 'بُلش رن' (Bullish Run) دیکھا جا رہا ہے۔
ٹریڈنگ کے آغاز پر ہی کے ایس ای 100 انڈیکس (KSE-100) میں 3 ہزار 964 پوائنٹس کی ریکارڈ تیزی دیکھی گئی۔ اس زبردست اضافے کے بعد انڈیکس 1 لاکھ 52 ہزار 707 کی تاریخی سطح پر پہنچ گیا ہے۔
 مارکیٹ میں ہر طرف ہریالی نظر آ رہی ہے اور بڑی کمپنیوں کے حصص کی قیمتوں میں نمایاں اضافہ ریکارڈ کیا گیا ہے۔